حال ہی میں اداکاری کی دنیا میں قدم رکھنے والی طوبی ٰ انوار کا کہنا ہے کہ وہ کم عمر سے ہی شوبز سے وابستہ ہیں اور بطورِ پروڈیوسر مارننگ شوز کر چکی ہیں۔
ٹی وی میزبان اور معروف سیاسی شخصیت مرحوم عامر لیاقت حسین کی سابقہ اہلیہ طوبیٰ انوار نے غیر ملکی نشریاتی ادارے کو دیئے انٹرویو میں کہا ہے کہ ’میں نہیں چاہتی کہ ذاتی معاملات کو سرکس بناؤں‘۔
شوبز کی دنیا میں بطور اداکارہ کام کرنے کے حوالے سے انہوں نے بتایا کہ وہ 18 سال کی عمر سے میڈیا سے وابستہ ہیں اور عامر لیاقت سے شادی سے پہلے بطور پروڈیوسر مارننگ شوز کیے ہیں۔
انہوں نے کہا کہ شادی کے ڈیڑھ دو سال میں نے کام نہیں کیا۔ شادی کے دو سال بعد میں نے باقاعدہ آڈیشن دیا اور اُس وقت یہ سوچ تھی کہ چلو کوئی نئی چیز کرتے ہیں۔
عامر لیاقت سے شادی اور دیگر معاملات میں ہونے والی تنقید کے بارے میں بات کرتے ہوئے انہوں نے کہا کہ جنہیں ہماری زندگی کے بارے میں کچھ بھی پتہ نہیں ہوتا وہ کہیں سے بھی اٹھ کر کچھ لکھ دیں تو تکلیف ہوتی ہے لیکن وقت کے ساتھ ساتھ میں نے اپنے آپ کو اس معاملے میں بہت مضبوط کر لیا ہے۔
طوبیٰ انور نے کہا کہ میں نے ہمیشہ خاموشی اختیار کی ہے اور ہر معاملے میں تحمل سے کام لیا ہے۔ آگ میں آپ کچھ ڈالتے رہیں گے تو وہ بھڑکتی رہے گی۔یہ کبھی بھی ختم نہیں ہو گی اور میں نہیں چاہتی کہ ذاتی معاملات کو سرکس بناؤں۔ ڈرامہ سیریل بچھو میں اپنے منفی کردار کے حوالے سے بات کرتے ہوئے انہوں نے کہا کہ مداح سمجھتے ہیں کہ منفی کردار نبھانے والے اداکار اپنی حقیقی زندگی میں بھی ایسے ہی ہوں گے لیکن میں ہمیشہ لوگوں کو کہتی ہوں کہ ایسا کچھ نہیں ہے۔ یہ اچھی بات ہے کہ لوگ مجھے میرے کام کی وجہ سے سراہ رہے ہیں۔ یاد رہے کہ 48 سالہ عامر لیاقت حسین نے 2018 میں 28 سالہ طوبیٰ انوار سے دوسری شادی کی تھی تاہم یہ شادی زیادہ عرصہ نہ رہ سکی اور 9 فروری2022 کو طوبیٰ نے عامر لیاقت سے علیحدگی کا اعلان کردیا تھا۔
