قومی کرکٹ ٹیم کے آل راؤنڈر شاداب خان نے انگلینڈ سے سیریز میں شکست کی وجہ مڈل آرڈر کو قرار دیدیا ، کہا کہ مڈل آرڈر اس طرح نہیں کھیل رہے جس طرح توقع تھی ۔
انگلینڈ سے ٹی 20 سیریز کے فیصلہ کن میچ میں شکست کے بعد نجی ٹی وی ” جیو نیوز” سے گفتگو کرتے ہوئے شاداب خان کا کہنا تھا کہ میں احتیاطی طور پر بلے بازی کیلئے نہیں آیا ، ورلڈ کپ کیلئے خود کو تیار کرنا ہے ، مڈل آرڈر سے جس طرح کی توقع کی جا رہی تھی وہ اس طرح نہیں کھیل پا رہے ۔
شاداب خان نے مزید کہا کہ ہم اٹیکنگ کرکٹ میں بہت پیچھے رہ گئے ہیں ، انگلینڈ کی ٹیم کی خاصیت ہے کہ ان کی وکٹیں گر بھی جائیں تو بھی وہ اٹیک کرتے ہیں، ہمارے پاس ایسے کھلاڑی ڈومیسٹک سے بھی نہیں آرہے ، ورلڈ کپ سے قبل غلطیوں کو دور کرنے کیلئے محنت کرنا ہوگی مگر اس کیلئے وقت درکار ہے ، ابھی ہماری نیوزی لینڈ سے سیریز ہے ، وہاں سامنے آنے والی خامیوں پر بھی قابو پانے کی کوشش کریں گے ۔
شاداب خان نے کہا کہ ورلڈ کپ سے قبل انگلینڈ سے سیریز کا فائدہ دونوں ممالک کی ٹیموں کو ہوا ۔ خیال رہے کہ انگلینڈ کی ٹیم 17 سال بعد پاکستان کے دورے پر آئی تھی جہاں اس نے 7 ٹی 20 میچز کھیلے ، پہلے 6 میچز میں سے پاکستان اور انگلینڈ نے 3-3 میچز جیتے جبکہ گزشتہ روز فیصلہ کن میچ میں قومی ٹیم کو 67 رنز سے شکست کا سامنا کرنا پڑا۔
