سب انسپکٹر سرور اکرم ڈاکوؤں کے ساتھ کراس فائرنگ میں شہادت کے رتبے پر فائز ہو گئے، فائرنگ تبادلے میں ایک ڈاکو بھی ہلاک ہوا. سرور اکرم شہید نے 2015 میں پولیس سروس جوائن کی، ایک کمسن بیٹے کے والد تھے۔
آئی جی پنجاب فیصل شاہکار نے ڈاکوؤں سے مقابلے میں شہید ہونے والے پاکپتن پولیس کے سب انسپکٹر سرور اکرم کو خراج تحسین پیش کیا ہے ،پاکپتن سب انسپکٹر سرور اکرم شہید فرض کی راہ میں جام شہادت نوش کرگئے ۔ آئی جی پنجاب کا کہنا تھا کہ پنجاب پولیس اپنے بہادر فرزند کی قربانی کو کبھی فراموش نہیں کرے گی ۔ شہید کی فیملی اور کم سن بیٹے کا بھرپور خیال رکھا جائے گا ۔ آئی جی پنجاب نے واقعہ کا نوٹس لیتے ہوئے آر پی او ساہیوال سے تفصیلی رپورٹ طلب کر لی۔آئی جی پنجاب نے ڈی پی او پاکپتن کو اپنی نگرانی میں واقعہ کی انکوائری کا حکم دیا، فائرنگ کے تبادلے میں ایک ڈاکو ہلاک اور دو پولیس اہلکار زخمی ہوئے، آئی جی پنجاب کا کہنا تھا کہ فائرنگ کرنے والے باقی ملزمان کو گرفتار کرکے قانون کے کٹہرے میں لایا جائے ۔ ملزمان کو قرار واقعی سزا دلوائی جائے گی ۔ انچارج چوکی فرید کوٹ پاکپتن سب انسپکٹر سرور اکرم گذشتہ رات اپنی ٹیم کے ہمراہ شہریوں کو لوٹنے والے ڈاکوؤں کا تعاقب کر رہے تھے ۔ضلع اوکاڑہ کی حدود میں کراس فائرنگ کے نتیجے میں جام شہادت نوش کیا ۔ہید سرور اکرم 20 اگست 2015 میں بطور سب انسپکٹر پولیس میں بھرتی ہوئے سوگوران میں بیوہ اور ڈیڑھ سالہ بیٹا اذان شامل ہیں۔
وزیراعلیٰ پنجاب چودھری پرویزالٰہی نے پاکپتن کے نواحی گاؤں میں ڈاکوؤں کی فائرنگ سے شہید سب انسپکٹر سرور اکرم کی قربانی کو خراج عقیدت پیش کیا اور کہا کہ شہید سب انسپکٹر سرور اکرم نے بہادری اور جرأت کے ساتھ ملزمان کا مقابلہ کیا۔ شہید سب انسپکٹر سرور اکرم نے فرض پر جان نچھاور کرکے پنجاب پولیس کا سر فخر سے بلند کیا سب انسپکٹر سرور اکرم نے شہادت کا بلندرتبہ پایا۔ سرور اکرم نے اپنی جان کا نذرانہ دے کر بہادری اور فرض شناسی کی اعلیٰ مثال قائم کی۔ وزیراعلیٰ چودھری پرویز الٰہی نے شہید سب انسپکٹر سرور اکرم کے اہل خانہ سے دلی ہمدردی و اظہار تعزیت کیا اور کہا کہ پنجاب حکومت شہید سب انسپکٹر سرور اکرم کے اہل خانہ کے ساتھ کھڑی ہے۔ شہید سب انسپکٹر سرور اکرم کے اہل خانہ کی پوری دیکھ بھال کریں گے۔ زخمی پولیس اہلکاروں کو علاج معالجے کی بہترین سہولتیں فراہم کی جائیں وزیراعلیٰ چودھری پرویز الٰہی نے انسپکٹر جنرل پولیس سے واقعہ کی رپورٹ طلب کر لی اور کہا کہ فائرنگ میں ملوث ملزمان کو جلد قانون کی گرفت میں لایا جائے۔
