اسلام آباد:وفاقی کابینہ نے محکمہ اینٹی کرپشن پنجاب کی جانب سے وفاقی وزیر داخلہ رانا ثناء اللہ کے وارنٹ جاری کرنے کی شدید مذمت کی ہے۔اطلاعات کے مطابق آج شام وزیراعظم شہباز شریف کی زیر صدارت وفاقی کابینہ کے اجلاس میں وزیر داخلہ نے بتایا کہ محکمہ اینٹی کرپشن پنجاب نے غلط ریکارڈ پیش کرکے وارنٹ حاصل کیے۔
اعلامیے کے مطابق اجلاس میں سائفر گمشدگی، مبینہ آڈیو لیکس سے متعلق جاری تحقیقات اور سیاسی امور کا بھی جائزہ لیا گیا۔
وفاقی کابینہ نے فیملی ویزٹ ویزا کی توسیع کی میعاد ایک سال سے بڑھا کر 2 سال کرنے اور توانائی کے مؤثر استعمال اور تحفظ کے اقدامات پر عملدرآمد کے روڈ میپ کے حوالہ سے مختصر، درمیانی اور طویل مدتی حکمت عملی کی تیاری کیلئے کمیٹی تشکیل دینے کی منظوری دے دی ہے۔
وفاقی کابینہ نے سوات میں اسکول وین پر فائرنگ کے واقعہ پر شدید تشویش کا اظہار کرتے ہوئے اس کی سخت الفاظ میں مذمت کی اور واقعہ میں شہید ہونے والوں کے لئے فاتحہ خوانی کی اور زخمی بچوں کی جلد صحت یابی کے لئے بھی دعا کی۔
اجلاس میں وزیراعظم نے دورہ تھر کا ذکر کرتے ہوئے کہا کہ تھرکول پراجیکٹ کے ذریعے سستی بجلی پیدا کی جاسکتی ہے، ماضی میں اس منصوبے کے حوالے سے غیر ضروری تاخیر کی گئی جو کہ کسی قومی المیے سے کم نہیں لیکن اب یہ منصوبہ ہماری ترجیحات میں شامل ہے۔
وزیراعظم نے مزید کہا کہ اس پراجیکٹ کی بدولت 24 بلین ڈالرز کے توانائی کے درآمدی بل کو کم کرنے میں مدد ملے گی۔
وفاقی کابینہ نے وزارتِ ہاؤسنگ اینڈ ورکس کی سفارش پر سپریم کورٹ آف پاکستان کی لاہور رجسٹری کے لئے نابھہ روڈ لاہور پر واقع 23 کنال اراضی سپریم کورٹ آف پاکستان کو الاٹ کرنے کی منظوری دے دی۔
وفاقی کابینہ نے وزارتِ داخلہ کی سفارش پر بھوٹان،مالدیپ، نیپال،روانڈا، بیلا رس اور سلواکیہ کو بزنس ویزالِسٹ میں شامل کرلیا تاکہ ان ممالک سے کاروباری تعلقات کو فروغ دیا جاسکے۔ وفاقی کابینہ نے وزارتِ داخلہ کی سفارش پر فیملی ویزٹ ویزا میں توسیع کی میعاد ایک سال سے بڑھا کر دو سال کرنے کی منظوری دے دی۔
وزارتِ داخلہ کی سفارش پر وفاقی کابینہ نے پاکستان آن لائن ویزا سسٹم میں درخواست گزار کے قیام کے مقام و پتہ، سپانسر کی لازمی تفصیلات سمیت ممکنہ انٹری اور رابطہ کی تفصیلات کے اضافہ کی منظوری دے دی۔
وزیراعظم نے وزارت توانائی کی جانب سے پیش کئے گئے توانائی کے مؤثر استعمال اور بچت کے اقدامات پر عملدرآمد کے روڈ میپ کے حوالے سے وزیرِ دفاع خواجہ محمد آصف کی سربراہی میں ایک کمیٹی بنانے کی ہدایت جاری کردی۔
