پی ایس ایل ڈرافٹنگ، کون سے غیرملکی کھلاڑی شامل ہوں گے؟

پاکستان سپر لیگ (پی ایس ایل) کے آٹھویں سیزن کی ڈرافٹنگ کے لیے 433 غیرملکی کھلاڑیوں نے آمادگی ظاہر کی ہے۔

پی ایس ایل انتظامیہ کے مطابق ٹورنامنٹ کھیلنے کی آمادگی ظاہر کرنے والوں میں افغانستان کے راشد خان، بنگلہ دیش کے شیکب الحسن، جنوبی افریقہ کے ڈیوڈ ملز، انگلینڈ کے ڈیوڈ ملان، افغانستان کے مجیب الرحمان، سری لنکا کے ونندو ہسارنگا، انگلینڈ کے الیکس ہیلز، آسٹریلیا کے ایرون فنچ اور نیوزی لینڈ کے جمی نیشم بھی شامل ہیں۔ جنوبی افریقہ کو ٹی20 ورلڈ کپ میں

شکست دے کر پاکستان کو سیمی فائنل میں پہنچنے میں مدد کرنے والی ٹیم نیدرز لینڈز کے بھی 15 کھلاڑی پی ایس ایل کی ڈرافٹنگ کے لیے حاضر ہوں گے۔
اس کے علاوہ سکاٹ لینڈ کے 10، متحدہ عرب امارات کے 25 اور کینیڈا کے 10 کھلاڑیوں نے بھی پی ایس ایل کھیلنے میں دلچسپی ظاہر کی ہے۔
پی ایس ایل انتظامیہ کے مطابق پاکستانی کرکٹ کے میگا ایونٹ کی ڈرافٹنگ کے لیے افغانستان کے 43، آسٹریلیا کے 14، بنگلہ دیش کے 28، انگلینڈ کے 139، آئرلینڈ کے 9، نیوزی لینڈ کے 6، جنوبی افریقہ کے 25، سری لنکا کے 60، ویسٹ انڈیر کے 38 اور زمبابوے کے 11 کھلاڑی بھی موجود ہوں گے۔ پی ایس ایل کا آٹھواں ایڈیشن اگلے سال فروری اور مارچ میں کھیلا جائے گا جہاں لاہور قلندرز اپنے ٹائٹل کا دفاع کریں گے۔